(2) عريس الاحلام جاى فى السكة
صفاء بنت ذكية يبان عليها الطيبة الجامدة اوى بس هى اكيد فاهمة اللى حواليها و يا اما مطنشة لان الموضوع اهيف من الاتفات اليه
او مستنية الوقت المناسب للرد
و ده يدل انها عارفة اللى بيحصل فى بيت اختنا هناء و دوريات القر اللى بتتقاسمها هى و منال عشان يحاولوا التاثير على صفاء فيقف حالها
يعنى ماشية على مبدا(يا نعيش عيشة فل يا نموت احنا الكل)
اكتر مبدا بكره فى حياتى منتهى الانانية
صفاء خرجت للبلكونة تشم شويه هوا بعد العريس الاخير ما مشى
و بصت كده لقت هناء هى كمان قاعدة ماسكة مجلة قال يعنى بتتفرج عليها و هى طبعا بتراقب صفاء زى فيلم (هذا هو الحب)
لما يحي شاهين كان بيراقب لبنى عب العزيز من الجرنال
و صفاء طبعا واخدة بالها بس عملت عبيطة عشان ماتحرجهاش و كمان هى حاسة ان الموضوع اهيف من انها تهتم بيه دلوقتى يعنى هى واثقة فى ربنا و عارفة ان كل شىء بيحصل لان مقدر له ان يحصل
بعد شويه دخلت مامة صفاء عليها لقيتها قاعدة جنبها كوباية الشاى و هى سرحانة
الام (بنفاذ صبر) : هاا يا صفاء ايه رايك فى العريس ده اظن مايتعيبش اهو مرتبه ممتاز و متدين و وسيم
صفاء : ايوة يا ماما بس ده هايسكنا مع امه
الام: طيب يعنى يا حبيبتى يسيبها و هى ملهاش حد لا انا مرضهاش ابدا
صفاء : بس يا ماما.....
الام : خلاص يا صفاء انا تعبت ده خامس عريس الشهر ده و ترفضيه و كل اللى اتقدمولك كانوا طالعين من عينى و انتى ولا عندك دم كفاية العريس بتاع الاسبوع اللى فات متدين و شيك و مستوى و وسيم و مقتدر و شاريكى و قال ايه مش عاجبك انه تخين بالذمة حد يقول كده يا ناس هو فى حد لاقى عرسان ماتبصى على جارتنا ولا انتى عميتى و شكلك عارفة و مستهبلة زى عادتك
يا بنتى بلاش البطر ده بكرة كل دول يلاقوا عرايس و انتى اللى هاتقعدى فى ارابيزى
صفاء: كل شىء نصيب يا اماما و اللى مكتوب على الجبين لازم تشوفه العين
الام : ايوة طبعا يا حبيبتى بس ربنا قال ان احنا ناخد بالاسباب انا هاقوم اصلى و ادعيلك يمكن ربنا يهديكى
صفاء رغم عقلها و تدينها لا ان فيها عيب غريب انها عايزة عريس كامل لا ينقصه شىء و مافيش انسان كامل و رغم ايمانها بالنصيب و القدر الا ان هى عكس ده خالص و مافيش انسان كامل فى الدنيا و هى مقتنعة انها تستحق احسن واحد فى الدنيا و انه جى فى السكة
اما امها فهى ام زى باقى الامهات نفسها تفرح ببنتها و تجوزها و خايفة تعنس و كل العرسان اللى اتقدموا مايتخيروش عن بعض
طيب هى تعمل ايه و الحل فى ايد بنتها و هى مش عايزة تغصب عليها و ماسكة باباها بالعافية و الراجل لو شافها يمكن يجتلها و يخلص من عارها ماهو التار ولا العار يا عواد
تانى يوم ليلى صاحبة صفاء عدت عليها اصلها عندها اجازة من الشغل و بقالهم كتير ماشفوش بعض
طبعا ليلى متشوقة تعرف الاخبار السعيدة من صفاء اصلها عرفة من ايمان زمليتهم انها جالها عريس للمرة العشر تاشر (هى البلد مابيتيلش فى بقها فولة)
ليلى : صافى حبيبتى ازيك يا قمر وحشانى مووت ..بقالنا كتير ماتقابلناش
صفاء : ازيك انتى يا ليلى و عاملة ايه فى شغلك الجديد؟؟؟
ليلى : اهو ماشية سيبك انتى منى انتى عاملة ايه ...سمعت انك جالك امبارح عريس
صفاء : و عرفتى منين ده لسة الحبر طازة... اكيد الرويتر ايمان صح؟؟؟
ليلى : الصراحة اه بس قوليلى انتى هاا وافقتى
(صمت للحظات )
ليلى: تاانى يا صفاء و المرة ده ليه بقى رفيع زيادة عن اللزوم ولا اشول يلا يلا شلينى
صفاء : يا جماعة انتو ليه كلكم مهاجمنى كده كانى عملت ذنب
ليلى : ذنب؟؟؟ لا العفو احنا اللى غلطنا ان احنا بتعبر واحدة زيك و بندورلك على عرسان
اوعى تكونى فاكرة ان هايجيلك عريس على حصان ابيض تحت الشباك و يصفرلك فاتنزلى ياخدك على القصر بتاعه و جزمتك تقع منك الساعة 12 بلاش احلام ديزنى اللى انتى عايشاها ده و فوقى و بلاش تضيعى فرص هاتندمى عليها بعدين
يلا انا ماشية بقى سلام لحسن لو قعدت اكتر من كده هاموت بالسكتة القلبية
خرجت ليلى و فضلت صفاء قاعدة بتعيد كلام صاحبتها فى دماغها كانها كانت محتاجة اللى يواجهها باحلامها عشان تفوق
كده خلصنا النهاردة اشوفكم بكرة و نشوف اختنا هناء بتعمل ايه هى و منال
2 اللى زارونى:
الجزء التانى فعلا ده حقيقى وبيحصل
كان فيه واحدة من صحباتىكده بالظبط جميلة ومؤدبة ومن عائلة محترمة واكتر واحدة فى اصحابى جالها عرسان
لكن كانت بتتحجج بحجج غريبة دا طويل قوى دا قصير دا كلمنى قبل ما يكلم بابا نقولها ماهو عايز يعرف مخطوبة واللا لا تقولك جرىء قوى يجى اللى مش جرىء تقولك دا هادى قوى كلنا اتجوزنا وخلفنا وهى لسه بترفض لحد ما واحدة صاحبتنا قالتلها انتى عارفة انتى عندك كام سنه قالتلها لسه فى العشرينات قلالت لها 29 وكام شهر يعنى 30 مش عشرينات
طبعا اتصدمت من المواجهة ورتبت مخها ورمت الافكار الغلط اللى فيه والحمد لله اتجوزت من شهرين واحد كويس
معلش طولت لكن فى بنات مبتبقيش عارفة ولاهى كمان عارفة هى عاوزة ايه
سلامى وتمنياتى بالنجاح
مامة مازن
بجد الموضوع بقى زيادة عن الحد
المفروض ان من ترضون خلقه و دينه فزوجوه
لكن دلوقتى كل واحدة عايزة شروط ليها محددة عشان تتجوز طب و بعدين طيب ما العريس ممكن يكون عنده شروط و بيتغاضى عنها عشان الحياة تمشى و لو عمل معاها كده اكيد هاتتضايق
شكرا على مرورك
تحياتى
إرسال تعليق