2009-12-17
مش عارفة اكتب ايه فى العنوان؟؟؟!!
Posted by Unknown at 7:57 م 8 اللى زارونى
2009-11-07
السنة ده ضباب و غيوم و زعابيب
و قل لن يصيبنا الا ما كتب الله لنا
لكن انا دلوقتى مش عارفة اعمل ايه
دخلنا متاخرين كله كان متنشن حتى المدرسين كانوا بيجروا فى المنهج و احنا نتنح لا احنا فاهمين و لا هما عارفين يخلصوا
جم بتوع الوزارة( ربنا ينتقم منهم يا رب) و قالوا شلنا من المنهج و هما اللى ماعندهمش دم كانوا ماضيين القرار من 3 اكتوبر و جايين يقولولنا فى اول نوفمبر
يعنى احنا و المدرسين ذنبنا ايه
دلوقت الاجازة بقت اسبوعين عشان مدرستى اتقفلت ( ماهو الدور كان جى جى )بركاتك يا ارمن ايوة كده اشتغلى اشتغلى
و اجازة العيد عشر ايام و احتمال تبقى شهر طيب و الامتحانات و المنهج ولا حد يعرف يعنى انا عندى وزارة مش شايفة شغلها و مش مرتبين نفسهم و ساعة الزنقة يتحركوا فى اخر ربع ساعة و تحصبل الكارثة و احنا بنتفرج
و بعدين يقولو هانشيل من المنهج
طبعا انا كل اللى معايا مبسوطين لان المنهج متخفف و الامتحانات هاتيجى سهلة جدا لان هما مش هايسقطوا حد و المواضيع سالكة معانا و احن نعتبر اكتر دفعة محظوظة لان ده اول مرة حاجات بالكمية ده تتشال
و مانكرش انى جزئيا مبسوطة بس.......
و بعدين احنا خارجين السنة ده مش فاهمين ولا مركزين ولا منتبهين و انا السنة الجاية ثانوية عامة
حد يقولى اعمل ايه
يا رب ساعدنى انا محتااااااااااااااااااااااسة
Posted by Unknown at 1:56 م 10 اللى زارونى
2009-08-15
اصحاب و لكن...اخر فصلين
في يوم و نانسى راجعة من الكليه مرت بالصدفة قدام بيت احمد
و شافته تحت البيت و معاه بنت و كانت بتسلم عليه و هو كان فرحان بيها اوى
طبعا هى من جوة بتغلى و نفسها تخرج من الشباك و تشد شعر البنت و تمسح بيها الاسفلت و روحت البيت و دخلت اوضتها و مكلمتش اى حد بتااااتا
و مامتها دخلت عليها تسالها فى ايه
هالة : هايدى يا حبيبتى مالك فى ايه دخلتى و كنت بكلمك مشيتى و مرضتيش عليا
هايدى: معلش يا ماما انا اسفة مخدتش بال
هالة : طيب مالك فى ايه؟
هايدى : ولا حاجة اصلى عندى صداع جامد لانى وقفت فى الشمس كتير
هالة : طيب يا حبيبتى ارتاحى شويه هاكون حضرت الغدا
طبعا هيدى لا كانت عندها صداع ولا بتاع ده كانت متضايقة من اللى شافته و قاعدة بتفكر فيه
و بليل قعدت تفكر (يعنى ايه انا قاعدة هنا بدح و اذاكر و اتعب و هو ولا سائل لما هو مش حاططنى فى باله اصلا يبقى انا بقى ماتعبش نفسى عشان حد مش مهتم بيا اصلا)
هايدى : الو
نانسى : هايدى غريبة انتى بتتصلى بيا انا قلت انك مش هاتعرفينى تانى خالص
هايدى : معلش ماتزعليش منى انتى رايحة حفلة قريب
نانسى : اه طبعا بكرة
هايدى : طيب انا ممكن اجى
نانسى : فى ايه يا هايدى
هايدى : ولا حاجة فى ايه انتى ينفع ولا لا؟؟
نانسى : طبعا ينفع اعدى عليكى الساعة كام
هايدى : لا لا ماتعديش عشان ماما متعرفش انا هاتصرف المهم قوليلى فين و امتى.
و بعد ما خلصت هايدى مع نانسى قامت تشوف هاتلبس ايه بكرة و تفكر هاتقول لمامتها ايه علشان تنزل
تانى يوم بعد ما رجعت من الكلية دخلت اودتها و اتصلت بصحبتها سارة انها هاتقول لمامتها انها عندها بتذاكر و اتفقت ان لو مامتها اتصلت تبقى تقولها اى حاجة
و فعلا لبست و قالت لمامتها اللى اتفقت عليه مع سارة
و نزلت هايدى و راحت الحفلة
وللصدفة و حظ هايدى ان مامة سارة صاحبة مامتها و ده اللى هى ماكنتش عاملة حسابه
هالة : الو ازيك يا منى
منى : اهلا ازيك يا هالة عاملة ايه ايه بقالك كتير مش ظاهرة
هالة : اهو ملخومة و ايه اخبار هايدى بتذاكر كويس
منى : هايدى؟؟؟؟ و ايه اللى هايجيب هايدى هنا
هالة : ازاى هى مش مع سارة بتذاكر؟
منى : لا خالص سارة لوحدها فى الاودة بتذاكر
هالة : اااه.....يمكن اتلخبطت بين سارة بنتك و سارة تانية
مش مشكلة المهم انى كلمتك و اتطمنت عليكى
و طبعا مامة هايدى كانت متنرفزة جدا جدا من هايدى و كدبتها و فضلت مستنياها
- كنتى فين يا هايدى
- ماما...خضتينى ازيك يا حبيبتى
- ردى على سؤالى كنتى فين؟؟
- ايه يا ماما مانتى عارفة كنت بذاكر عند سارة صحبتى
- انتى كدابة......انا كلمت مامتها و لسوء حظك كدبتك اتكشفت اتفضلى قوليلى كنتى فين....طبعا كنتى فى حفلة و اكيد كنتى مع اللى اسمها نانسى ده ... انتى مش وعدتينى انك هاتبطلى الحفلات بتاعتك وده
من النهاردة مافيش خروج و انا اللى هاوصلك و اجيبك من الجامعة و مش هاتذاكرى غير لوحدك
- لا يا ماما ماينفعش انك تصادرى حريتى
- حريتك..... مانا اديتك الحرية و استهترتى و افتكرتى انها سايبة
- بس يا ماما....
- مافيش بس اتفضلى خشى اوضتك
عدت الايام و خلصت الدراسة و تقريبا هايدى ماتعرفش عن نانسى شىء و هى كانت حاسة بشىء من الارتياح انها بطلت تسهر و حست ان يومها مرتب و قدرت تنجز كتير و حسنت من مستواها و كمان كانت قلقانة على نانسى انها مستواها نزل اوى و بقت مش منتبهة و دايما تيجى نايمة و مش مظبوطة
المووهم اخر يوم نانسى كلمت هايدى عشان تروح معاها حفلة عند واحدة زميلتهم اهلها مسافرين
و هايدى كانت عايزة تروح و كانت على وشك تروح بس هى ماكنتش عايزة تعمل مشاكل خصوصا ان مامتها ابتدت ترضى عنها و كمان انها ابتدت تحب البعد عن الحفلات ده و كمان انها ابتدت تقرب من ربنا شوية ضغيرة و كانت بتفكر فى الحجاب لكن كانت مجرد فكرة
و على الساعة 3 و نص كده التليفون رنننننننننن.
(6) و الاخيرة
- الو حضرتك انسة هايدى
- ايوة انا,مين معايا؟؟
- احنا مستشفى المعادى
- خير فى حاجة
- مش حضرتك صديقة الانسة نانسى سالم؟؟
- ايوة هى حصلها حاجة؟؟؟
- حضرتك تقدرى تيجى حالا المستشفى
- حاضر حاضر
طبعا هايدى كانت مفزوعة ان صاحبتها فى المستشفى
و راحت صحت باباها و مامتها عشان يروحوا معاها ماهو مش معقول هاتنزل لوحدها
و لما وصلوا المستشفى راحت تقابل الدكتور تعرف فى ايه
- انا هايدى صحبة نانسى يا دكتور
- اهلا يا هايدى....
- هو فى ايه يا دكتور ماحدش من الاستعلامات قاللى حاجة هى نانسى مالها؟؟ هو ايه اللى حصل؟؟؟
- والله انا مش عارف اقولك ايه
- ايه يا دكتور من فضلك اتكلم
- انتى كنتى عارفة ان صحبتك النهاردة فى حفلة
- ايوة....
- للاسف الفيلا اللى تمت فى الحفلة حصل فيها حريق جامد جدا
بسبب سيجارة وقعت على سجادة و بعدين ماعرفوش يسيطروا على الحريق لان الظاهر ان الفيلا كانت جديدة و الحوائط كانت لسة مدهونة
و للاسفة نجى من الحريق اتنين بس و الباقى فى منهم مصاب اصابة خطر و فى اللى مات
- طيب و نانسى يا دكتور؟؟
- البقاء لله
- لا لا ازاى يعنى ده كانت لسة مكلمانى و كانت فرحانة بالاجازة
هالة: طيب حضرتك ما طلبتش اهلها ليه يا دكتور؟؟
- ما هو للاسف اللى نجوا من الحريق ما كانوش يعرفوا غير نمرة هايدى بس و قالوا انها تعرف نمرة اهلها
و فعلا ادت هايدى نمرة اهل نانسى للاستعلامات اللى كلموهم ييجوا يستلموا جثة نانسى.
هايدى كانت فى انهيار تام من الخبر و روحت البيت مش مصدقة اللى حصل و قعدت مدة عقبال ما استوعبت ان صحبتها المقربة ماتت من غير انذار و فجاة من غير مقدمات و كانت لسة بتكلمها عشان تيجى الحفلة و قعدت تفكر يعنى انا لو كنت روحت كنت مت
و يوم الدفنة بقت تشوف صحبتها بتتدفن لوحدها فى التراب صامتة مابتتكلمش لا حول لها ولا قوة لا تستطيع انها تعترض و قعدت تفكر انها فى يوم من الايام هاتكون مكانها بس فكرت هل هايبقى مصيرى زيها اموت و انا بسكر و برقص
و بعد ما رجعت من الفنة و العزا و خلاص رجعت البيت
دخلت اوضتها و قعدت كده تفكر
ايه ده بقى نانسى اللى كلها حيوية النهاردة ادفنت و كانت صامتة و لا بتتحرك ده كانت زى افراشة طول اليوم تنطيط
بس هى ماتت موتة وحشة اوى
طيب لو مت زيها كده ايه هايكون مصيرى زيها ولا
و فى اليوم ده قررت انها تتحجب بعد ما كانت مجرد فكرة فى دماغها
و قررت انها تلتزم بعد اللى شافته
لانها مش ضامنة حياتها
و بعد الموضوع ده بحوالى شهرين و بعد ما كنت التزمت و بقت كويسة لقت احمد جاى هو ولدته و اخته عشان يخطبوها
عارفين مين اخته؟؟
البنت اللى كانت بتسلم عليه فى الشارع و هايدى شافتهم و اتضيقت
و طبعا هايدى فى نفسها كانت متضايقة انها ظلمته
و فعلا اتخطبوا و اتفقوا انهم يخلصوا الجامعة و يتجوزوا
زى ما قلت فى الاول لو كن فاكرين نفسنا نقدر نبعد عن الخطر مهما كان نبقى غلطانين و الصحبة بتساعد على الطريق الى مشينا فيه
لو كانوا صحبة سوء يبقى اكيد هاننجر معاهم حتى لو كنا كويسين
و لو كانوا صحبة خير يبقى هايشدونا و لو كنا مش كويسين
لازم نختار اصحابنا صح
كلنا مرينا بتجربة مشابهه أو بعيدة تماما عن هذه المشاكل في قصتي بس عرفنا فيها معادن الأصدقاء أو بعض من يدعي أنه صديق
ربنا يرزقكم الصحبة الصالحة زي اللي رزقني بيها من خلال
صديقتى الصدوقة اللى بجد نفسى نفضل اصحاب ورفيقات في الله على طووووووووول.
Posted by Unknown at 9:52 ص 5 اللى زارونى
2009-08-14
اصحاب و لكن
لما رجعت هايدى البيت كانت متضايقة و مصدومة
متضايقة لانها مش قادرة تكلم احمد و لا حتى تسلم عليه كزميل
و مصدومة (مش عشان الفستان) لا بس عشان صاحبتها ابدت تمشى فى سكة غلط و ابتدت تبعد و مش بتسمع نصيحتها و بتقول لنفسها انها مش لازم تخون الثقة اللى ماماتها مدياهلها ولا ون بابها مش عارف عنها شىء
ووسط كل ده التليفون رن
هايدى: الو؟؟
****: الو , الانسة هايدى؟
هايدى: ايوة مين معايا؟
****: مش مهم انا مين المهم انتى لازم تيجى بسرعة
هايدى: اجى ...اجى فين و ازاى عايزنى اجى من غير ماعرف انت مين لو بتستظرف اقفل احسن لك
****: انا مش بهزر و لو ماجتيش فى ظرف نص ساعة هانقتل احمد
هايدى فى(صاعقة): طيب طيب انا اجى فين؟؟
و راحت هايدى للعنوان اللى المجهول وصف لها
و اول ما وصلت لقت انا المكان ده عبارة عن فيلا ضربت الجرس و و فجاة
مفاجأأأأأأأأأأأأة
طبعا هايدى كانت فى منتهى الغضب ازاى صاحبتها تعمل فيها المقلب ده
طبعا هايدى كانت هاتمشى من كتر الزعل بس صالحوها و قالولها انهم كانو عايزين يجيبوها عشان هى مشيت بدرى من الحفلة
المهم سهروا و انبسطوا و بعدين نانسى جابت لهايدى حاجة تشربها و كانت حطاها فى كوباية غامقة و لما سالتها قالت لها عصير
نانسى: خدى يا هايدى اشربى انتى امشربتيش حاجة من ساعة ماجيتى
هايدى: ايه ده؟؟؟
نانسى: عصير هايكون ايه يعنى
هايدى (بعد ما شربت حبة): ايه ده يا نانسى انا قلت لك مش هاشرب مصرة تعملى اللى فى دماغك
نانسى: ايه ايه خلاص شربتى و اللى حصل حصل جرالك حاجة موتى منه مانتى زى الفل و تمام و هاتتعودى عليه
هايدى فكرت للحظة و قالت لنفسها خلاص جربته و للى حصل حصل جرى ايه يعنى
فعلا الصاحب ساحب لو افتكرنا نفسنا نقدر نقف و نواجه المخاطر بنفسنا نبقى بنفكر غلط مهما قلتى انا متربيه و مافيش حاجة تاثر عليا تبقى غلطانة الصحبة بتسحب الواحد و بتخليه يبقى زيهم حلوين كانوا او وحشين
و من هنا بييجى اختيار الصاحب ماهو نانسى و هايدى اصحاب من زمان بس نانسى اتعرفت على ناس نسوها الدنيا و مع كل ده هى اصلا عندها الاستعداد من الاول لانها ماعندهاش رقابة نهائى و صغيرة و نفسها تجرب اى شىء
رجعت هايدى البيت الساعة 12 و كانت حالتها سيئه للغاية بسبب اللى شربته و لما شفت مامتها كانت مش عارفة تدارى الحالة ازاى فعملت نفسها دايخة و مش عارفة تمشى
مامتها : هايدى مالك يا حبيبتى؟؟؟
هايدى : هااا...اه لا مافيش يا ماما انا بس دايخة شويه اكمنى صاحية من بدرى
مامتها : يا حبيبتى طيب اطلعى استريحى فى الاودة بتعتك
و طلعت هايدى و خلاص كان تمكن منها الشيطان و نامت و تقريبا غايبة عن الدنيا
(4)
مرت الايام و ساءت حالة هايدى اهملت مذاكرتها و ابتدت تسهر كتير و تروح حفلات كتيرو تشرب كتير و طبعا بقت تكدب على مامتها كتير و مامتها ابتدت تلاحظ ده و ابتد تراقبها و منعتها من انها تروح الحفلات ده مع اصحابها .
و فى يوم نانسى كلمتها عشان تروح معاها حفلة فى بيت صحبتهم اللى مامتها و باباها مسافرين
نانسى: الو يا هايدى
هالة: انا مش هايدى انا مامتها
نانسى: اهلا يا طنط امال هايدى فين
هالة: هايدى مش فاضية ,بتذاكر و لو سمحتى يا نانسى بطلى شويه اللى بتعمليه ده و كفاية الحفلات ده و يا ريت ماتتصليش هنا تانى.
نانسى كانت مستغربة من كلام مامة هايدى و كمان ان فجأة هايدى مابقتش ترد و مش بتيجى
اما هايدى فكانت غضبانة جدا من اللى حصل و اتضايقت جدا من
اللى قالته مامتها و انها مش هاتشوف نانسى تانى او على الاقل دلوقتى
هايدى: انتى ازاى تعملى كده و تقفلى فى ش نانسى
هالة: انتى اتجننتى ازاى تكلمينى بالطريقة ده و بعدين انا مامتك و خايفة عليكى و البنت ده هاتضيع مستقبلك
هايدى: ده صحبتى و انا اللى اخترتها و مش هاسيبها
هالة : و انا امك و من حقى اخاف عليكى و على مصلحتك اتفضلى خشى اوضتك و ماتطلعيش منها تانى.
ام هايدى حست بالخطر اللى بيحوم حوالين بنتها و انها هاتواجه خطر كبير جدا
فى نفس الوقت كانت هايدى بتكلم نانسى من الموبايل بتعها و اتفقت معاها انها هاتتفق مع منار صحبتهم و هاتفهم ماماتها انها هاتذاكر عندها بعد ما تصالحها و بكده تقدر تخرج و تروح المكان اللى هى عايزاه
و فى يوم من ايام السهر و الحفلات و هى مروحه شافت احمد بالصدفة و راح بصلها بصة هى حست منها انها تافهة و ماتستاهلش الحب اللى حبتهوله و بصته ده فوقتها بس هو كان متفاجا من اللى شافه و مشى من غير ميبص عليها تانى
رجعت هايدى البيت حزينة و ندمانه على اللى عملته و قررت انا تبطل حفلات و سهر و تذاكر مش عشان احمد بس ولكن كمان عشان اليوم ده حست قد ايه هى انسانة تافهة و من غير هدف
و صالحت مامتها و قالت لها قد ايه هى اسفة على اللى عملته
و فى يوم نانسى اتصلت بهايدى
هايدى: الو مين؟؟
نانسى: انا نانسى يا هايدى ايه نسيتى صوتى
هايدى:هاى يا نانسى عاملة ايه؟
نانسى:الحمد لله كويسة,بقولك احنا النهارده عندنا حفلة انما ايه.....
هايدى: معلش يا نانسى انا مش هاقدر احضر حفلات
نانسى: ده من ايه ده بقى ليه يا هايدى ايه اللى حصل
هايدى:حصل حاجات كتير المهم انا هابطل الحفلات بتاعتنا و انتى كمان لازم تلتفتى لمذاكرتك و تبطلى سهر
نانسى:لاااا ده فى حاجة اكيد حصلت غيرتك اوى كده
هايدى : بصى يا نانسى انا خلاص قررت عاجبك او لا انا هابطل شرب و سهر و كل ده و لو مابتطلتيش خلاص براحتك
و قفلت هايدى السكة مع نانسى و هى متضايقة ان ده صاحبتها برده بس هى كانت حاطة بصة احمد ليها و كانت مش عارفة تبررله ده بايه غير انها تتحسن و هو يشوف ده لان اصلا ماكنش فى حوار بينهم من الاول فا هاتروح بصفة ايه.
ابتدت هايدى تذاكر بانتظام لدرجة ان مامتها استغربت معقول ده هايدى بنتى معقول.
و مرت الايام و هايدى علاقتها بنانسى مش زى الاول و نانسى عازز عليها ازاى تتصل بيها و هى اخر مرة مكلماها بشدة و بعدين قفلت.
Posted by Unknown at 8:18 ص 2 اللى زارونى
2009-08-09
اصحاب و لكن
البداية دايما تجر النهاية و هى دايمة بتكون النهاية
ساعات بفكر يعنى ليه الواحد بيسيب نفسه تروح للغلط مع ادراكه انه غلط و ان ليه عواقب لكن وقتها بيفقد التمييز و الاحساس زى المدمن اللى لايرى و لا يسمع غير المخدر
سبحان الله طيب ليه ربنا خلق لنا عقل
مش عشان نميز بيه و نوقف نفسنا لما نعدى الخط الاحمر
تلخيص كل ده فى قصة القصة ده انا قتبستها عن فيلم اجنبى فيها عبر و عظات كتيييييييييير
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بنتين اصحاب من زمان من ايام المدرسة و للصدفة دخلوا نفس الجامعة و نفس الكلية
البنتين دول نانسى و هايدى تعالوا نشوف حكايتهم
نانسى بنت فى سن ال20 و هى فى كلية بيزنيس ادمينيستراشين. باباها رجل اعمال مهم و غنى جدا
مامتها واحدة من سيدات المجتمع اللى بيقولوا عليهم دول اللى نص وقتها الصبح فى النوادى و الكوافير و المحلات و باليل نوم و تليفونات و اسمها منال
اما هايدى فا باباها عضو مهم فى مجلس الشعب و رجل غنى جدا و مامتها ست طيبة و مسؤله و بتحب ولادها جدا و اسمها هالة
طبعا طيبتها ده كانت زايدة جدا و ادت الى ثقة زايدة جدا برده و هى فى نفس الجامعة بتاعت نانسى و صحاب جدا جدا جدا
نانسى و هايدى التوأم المختلف
كل حاجة بيعملوها مع بعض ,بيجيبوا لبس مع بعض و ساعات زى بعض اكلهم دايما مع بعض الا العشا بس
بيذاكروا عند بعض وكل كل حاجة مع بعض
و تقريبا مافيش حاجة عند واحدة مش عند التانية
نانسى بحكم الحالة الاجتماعية بتاعتها طبعا عندها التزامات اقل و وقت فراغ كبير و المذاكرة بتبقى فى اخر اسبوعين و برشام
و معظم الوقت يا اما فى نادى او فى ديسكو او مع صحباتها يعنى كل اللى قلبك يحبه
اما هايدى فبالرغم من انها صحبتها الانتيم الا ان هى مش دايما تروح معاها الديسكوهات مع العلم انها برده بتروح لكن قليل
هايدى اصلا كانت ملتزمة (مذاكرة و كده) جدا جدا بس مع الوقت ابتدت تفلت اللجام و ابتدت تقلد نانسى ماهو الصاحب ساحب
و لكن الرقابة النسبية عليها فى البيت مش مخلياها على راحتها اوى يعنى و برده ساعات بضطر انها تقعد فى البيت و فى يوم نانسى كلمت هايدى فى البيت
- الو هاى يا نيسو عاملة ايه ؟
- تمام الحمد لله انتى ايه اخبارك ماجيتيش امبارح الparty ليه؟
ده ميزو كان عامل حته party وهمية فاتك نص عمرك.
- معلش بقى اصل ماما و بابا كانوا فى البيت و دبت خناقة لرب السما فى البيت و خفت اقول لهم اتحدف بحاجة و كمان ما كنتش اقدر اخرج و باسم اخويا هنا و بعدين انا اصلا مش بحب الواد ميزو ده بحس انه واد ملزق كده و عامل زى الاستك
- استك برده .....ده روش اوى و بعدين محبوب انتى اللى تنكة و مش بيعجبك العجب.
- طيب يا روحى خلينا لك العجب.
- المهم سيبك منه النهاردة عندنا surprise party بتاعت دينا و لازم تيجى ده هاتبقى جنان و كمان عملينهالها فى المريديان
- اه ما انا عارفة ,هاشوف ظروفى
- على فكرة احمد جى الحفلة
- هو انتى بقى اللى هاتعدى عليا و لا نتقابل هناك؟
اصل هايدى معجبة باحمد و هو كمان معجب بيها بس مش مبين خالص و هى هاتموت و تعرف شعوره من ناحيتها ايه
- بقولك ايه هاتلبسى ايه النهاردة؟
- مش عارفة هابقى اشوف لسة مش مقررة يلا بقى لازم اقفل سلام.
اصل زى م انتو عارفين هما بيبلبسوا زى بعض,
بس فى وجود احمد هايدى عايزة تظهر ليها شخصيتها و تبان مختلفة عن نانسى و مش عايزاها تعرف هى هاتلبس ايه.
بعد ما قعدت هايدى تدور على لبس تروح بيه الحفلة و تدور و تفحص
لقت فستان عندها جميل و شيك و لونه حلو عليها
قررت تلبسه و بعد ما اتظبطت خرجت من غرفتها عشان تروح الحفلة
- رايحة فين يا حبيبتى؟
- رايحة عيد ميلاد صحبتى يا ماما
- ماتتاخريش يا حبيبتى
- حاضر يا ماما ماتقلقيش عليا انتى بس
خرجت هايدى من البيت و عمالة تفكر يا ترى احمد هايلاحظها وسط كل اللى جايين و يا ترى هى شكلها حلو و الفستان اللى لبستو حلو ولا ماعرفتش تختار صح
الموهم وصلت هايدى للمريديان و نزلت و لقت البنات كلها مستنينها
و اول ما قربت منهم ان هى الا الصاااااعقة
و فجاه تنحت هايدى و ازبهلت و كانت هاتعيط من اللى شافته
لانها لقت ان نانسى لبسه اخو الفستان بتاعها (مش توام بيحسوا ببعض) و طبعا الغرض مش هايتحقق
- ايه يا نانسى ده انتى لبستى الفستان ده ليه؟؟؟
- فى ايه يا هايدى عادى انا قلت انه فستان حلو و شيك و توقعت انك هاتلبسيه
- يعنى لازم تتوقعى النهاردة
- بتقولى ايه يا هايدى
- لا ولا حاجة بقول صدفة حلوة اوى عن اذنك ثانية هاروح الحمام
دخلت الحمام و كانت عايزة تصرخ من كتر الغيظ و غسلت و شها و عدلت المكياج و قالت تخرج بقى لحسن يلاحظو غيابها
خرجت وصلت للوبى و شافت احمد واقف و معاه بنتين بيسلموا عليه و كان معاه صاحبه معتز
و طبعا اول ما شافته و معاه البنات اتضيقت و اللى لاحظ كده نانسى راحت لها و قالت لها:
- اتلحلحى روحى سلمى عليه
- و انا اروح ليه؟؟
- يا بت انا اكتر واحدة فاهماكى
- فاهمانى...قص...قصدك ايه يعنى انا مش فاهمة؟
- قصدى انك هاتموتى و تروحى تسلمى عليه و نفسك ييجى يكلمك
- انا و انا هاعوز كده ليه ماهو زميل زى باقى زميلنا عادى يعنى
- براحتك انا قلت لك و انتى حرة
قعدت تفكر هايدى تعمل ايه تروح تكلمه ولا تطنش و هو اصلا اللى المفرض يكلمها
وفى الاخر قررت انها اصلا مش هاتكلمه انها عندها كرامة واللى عايزنى يجيلى انا مابروحش لحد.
طبعا احنا قلنا ان احمد بيحب هايدى بس مش متاكد من مشاعرها و خايف يصارحها تكسفه
- معتز اروح اكلم هايدى و الا انت شايف ايه؟؟؟
- والله انا معرفش بس شكلها مش مدياك وش خالص
- عندك حق فعلا هى شكلها مش واخدة بالها منى خالص
- هايدى خدى
- ايه ده يا نانسى؟؟؟!!!
- فى ايه ده مرة يا بنتى مش هاتضر
- لا يا نانسى لا انا ولا انتى هانشرب
- لا انتى حرة فى نفسك بس انا لا
- ماشى يا نانسى براحتك
و مشيت هايدى حتى قبل ما تخلص الحفلة و كانت الساعة يا دوب 7 و نص
Posted by Unknown at 1:38 م 0 اللى زارونى
2009-07-18
يعنى خلاااص مافيش اماااااان؟؟؟؟:(
افتقدنا ايه فى مصر عشان يحصل كده
Posted by Unknown at 10:19 ص 13 اللى زارونى
2009-06-21
كفاااااااااية استفزاز بقى
الدم و الاحساس اتسحبوا من البلد زى كحك العيد كده بالظيط
طوول ما انا ماشية بشوف حاجات تستفز الواحد و يبقى عايزيروح يسال اللى قدامه هو انت عندك دم؟؟؟؟؟؟؟!!!!! ههههههههه
يعنى مثلا دخلت اشترى حاجات من محل ملابس حريمى لقيتلك واحد راجل واقف فى المحل!!!!!!!!!!!1111 طبعا الازبهلال نزل عليا و ماكنتش عارفة اعمل ايه؟؟؟؟ ارحله يعنى اشترى منه و كنت عايزة اقوله حضرتك هنا تبيغع ولا تشترى؟؟؟؟؟؟؟!!!!! ماتستغربوش علامات الاستفهام الكتيرة ده ده فى من النوع دع كتيييييييييير طيب و النبى يعنى مالقيتش غير المحل ده اللى تقعد فيه لا و لو دخلتى المحل تلاقى المناظر اللى متعلقة تفرح تقعده فى المحل ما يقومش منه بتاااااااااتاا
اما النوع التانى من الاستفزاز هو التطفل و الحشرة الكدابة
كنت رايحة اشتر لبس و طبيعى جدا لما هاجيب لبس هاقيسه طبعا المهم قسته و بفتح البروفة عشان افرج ماما و لقيت يا سبحان الله شاب طول بعرض كدة واقف وراها و بيتفرج!!!!!
فى حاجة يا كابتن ما تتفضل تخش تقيس معايا
و بيدى رايه يا سلااام على الروقان
يهنى ايه يعنى ولد يعد يتفرج على بنت و هى بتقيس و انت مالك حد طلب من رايك اكمن انت يعنى بتشتغل فى المحل واخدها حلوانة فى سلوانة حاجة عسل والله
نوع من انواع الاستفزاز اللى منتشر اليومين دول و اللى لا يخفى على بشر النص حجاب
تلاقى البنت ماشاء الله مكلفتة راسها ولابسة سبع تمن ايشاربات و خايفة قصوصة باينه من شعرها
لالا لا يا رضوى عيب امال جاب ايه ده بقى اللى يبين الشعر اومل ربنا قال نتحجب ليه؟؟؟؟
تنزلى شويه كده عن مستوى الراس و تلاقى المفاجاة "بدلة راس "
يا خراشى مش ده البت اللى كانت قربت تغطى راسها من كتر الطرح اللى حطاها اومال ايه اللى هى قلعاه تحت ده
تلاقى بقى البنت لابسة بدى سلفاه من اختها اللى عندها 8 سنين
و بنطلون عندها من اعدادية مزنوقة فيه و بتمشى بالراحة تحسبا لاى خطوةغير مسؤله ينتج عنها حدث غير مرغوب فيه فى الشارع و تبقى الالعة رسمى نظمى فهمى
لولولولولولى يا فرحتى بيكى ياختى
حاجة تخليك تكره حياتك و عيشتك و الناس
طيب ليه ليه بجد
ليه الولد مايشتغلش الشغلة اللى تليق بيه كولد مهما كانت المهم مايبقاش فى وضع غير مرغوب فيه
و ليه البنت تتجنب المضايقات بانها تستر نفسها بدل ماهى نص لابس و نص قالع و ساعات بيبقى حجاب تيك اواى اللى هو مغطية نص شعرها كمان
يعنى هو مكتوب عليا انى افضل مستفزة كده
و اكيد الاستفزاز مش هايخلص من البلد
ربنا يهدى المسلمين و غير المسلمين و يرحمنا بقى عايزين تشجيع يا جماعة
وياريت اللى قابل موقف مستفز ليه يقولى
تحياتى :)
Posted by Unknown at 5:55 م 11 اللى زارونى
2009-06-18
صدمة فوقتنى
امبارح كان صدمة ليا بكل المقاييس
عمرى فى حياتى ما حسيت الاحساس ده
انا عمرى فى حياتى ما عشت وفاة حد قريب منى ,اوقات تعبه و موته
بجد حسييت ياااه انام اصحى الاقيه ماات!!!!!!!!!!
علامات استفهام كتييييير فى دماغى
حاجة واحدة بس اللى ادركتها من وفاة جدى رحمة الله عليه
الوقت بيمر بسرعة و الدقيقة اللى بتفوت مش بترجع تانى
و النفس اللى بيطلقه الانسان مايقدرش يرجعه تانى
عشان كده لازم نتعظ من المواقف اللى فى حياتنا ده
و بالذات من الموت لانه رحلة لا عوده منها و اللى هاينسى حاجة فى الدنيا مش هايعرف يجبها تانى
فبالله عليكم
حاولوا تحافظوا على اللى باقى من عمركم عشان ربنا يغفر لكم اللى فات
الدنيا ده مش مستاهلة الواحد يخاصم عشانها يظلم عشانها يسرق , يقتل او يعمل اى حاجة غلط لانها ولا شىء
والله بس النهارده حسيت بخوف شديد مش من انى اموت ولكن من انى اموت مش مستعدة للقاء الله
و يوم ما يخلص معاد الامتحان اسلم ورقتى فاضية من غير حاجة ترفع من حسناتى
لا اله الا الله محمد رسول الله
Posted by Unknown at 7:07 م 4 اللى زارونى
2009-04-25
عانس تحت ال30 و زوجة فوقها
Posted by Unknown at 5:01 م 2 اللى زارونى
2009-04-24
عانس تحت ال30 و زوجة فوقها
Posted by Unknown at 5:03 م 8 اللى زارونى
2009-04-23
حبة غلاسة .......حرقة دم .....خش و هاتدعى عليا(ههههه)
القطة علشان بتخربش كتير و عمرها ما كسبت
==========================
طيب ايه اكتر حيوان بيسمع اغاني اجنبي ؟
الغراب راب راب راب راب راب
==========================
طيب ايه اكتر حيوان بيسيح في الحر ؟
تمساح ساح ساح ساح ساح
==========================
ليه مفيش ماتشات بتتلعب يوم الجمعة ؟
علشان الكورة مع دريم
==========================
ليه مفيش ماتشات بتتلعب يوم السبت ؟
علشان إعادة الكورة مع دريم
==========================
ليه الصعيدي بيحب يتصور جنب الأهرامات ؟
علشان يطلع في الشلن
==========================
-سمعت نكتة الأسانسير ؟
- لأ
- يبقى اكيد كنت طالع على السلم
==========================
إزاي نحط فيل في كباية من غير ما يلمسوا بعض ؟
نحط بينهم فيل تالت .
==========================
حاجة سودة و ب 3 رجول و في الصحراء ؟
بيانو
==========================
واحد عنده 100 عيل و عايز يجيب عربيه تقضيهم .. يجيب ايه ؟
ميتسوبيشي طبعا ً ... و يدي كل واحد سوبشيايا .. [ميتسوبيشي = 100 سوبيشي ]
==========================
بيركب الميكروباص ؟؟ Emniem ليه
50Centعلشان مش معاه غير
==========================
ليه البني آدم مش ببذر ؟؟
علشان بصرة
==========================
لو عندك تفاحة حمراء (امريكاني) و تفاحة خضراء (بلدي) و عايزهم يبقوا نفس اللون تعمل ايه ؟
تقشرهم
==========================
ليه السمك بيخاف من فودافون ؟
علشان اكبر شبكة
==========================
ليه مصر مش محتاجة بطاطين ؟
علشان اتصالات غطت مصر كلها ..
--------------------------
واحد قال لأبوه بابا عاوز أكمل دراستي بره قال وايه المشكلة، قول لأمك تفرشلك في الحوش بس خد بالك لتبرد
__________________________
مرة اتنين أغبية كانوا ماشيين في الصحراء طلع عليهم اسد راح واحد رمى عليه طوبه وقعد يجرى وبص وراه لقى زميله واقف ما بيجريش قاله ما بتجريش ليه ؟ قاله واجرى ليه هو انا اللى ضربته
__________________________
مره واحده حامل ابنها الصغير بيسألها:ايه اللي في بطنك ده يا ماما قالتله :ده أخوك يا حبيبي...تاني يوم و هوه في المدرسه المدرس سأله:انت عندك اخوات؟ قاله:كان عندي واحد بس ماما أكلته.
**************************
مره طالبه مشاغبه المدرس اشتكاها للمدير المدير بعتلها قال لها "عملتى ايه؟" قالت له "ولا حاحه رميت ورده من الشباك" قال "بس كده؟" قالتله "اه" بعد شويه لقى طالبه مدغدغه ومكسره سالها "ايه الى عمل فيكى كده؟" قالت له "انا ورده الى اترميت من الشباك."
**************************
مرة تلميذ بيسأل الأستاذ بيقول له:هو ممكن يعاقب الإنسان على حاجة معملهاش؟قال له:لا طبعا . ففرح التلميذ اوى و قال له خلاص انا معملتش الواجب
**************************
واحد اخترع حبوب للحامل علشان المولود يطلع مؤدب وكل مولود فعلا نزل مؤدب . واحدة أخدت الحبوب وماولدتش في المعاد فراحت للدكتور عملها ولادة قيصرية ، لقى توأم كل واحد بيعزم علي التانى ويقول له "اتفضل" التاني يقوله "لأ اتفضل إنت الأول."
**************************
توأم بيقول لأخوه التوأم وهو متنرفز إنت كنت فين ياعم أمك حمتنى مرتين
**************************
مرة ولد صغير سأل والده: باب انت جبتني ازاي؟ قال اللأب: بص يا حبيبي احنا جبنا شوية سكر و حطناهم تحت السجادة جينا تاني يوم و رفعنا السجادة وجدناك. ففكر الابن فيها "إيه لو أبقي أب من الأن" فجاب شوية سكر و وضعهم تحت السجادة صحي تاني يوم وجد صرصور فقال:"لو ماكونتش ابني انا كنت قتلتك."
**************************
تلميذ أحول بيكتب حلو قوى ..ولكن فى كراسة زميله ..الأبلة قالتله لو ركزت وكتبت فى كراستك هاديلك هدية حلوة ..فكتب فى كراسته ..راحت الأبله ادته بسكوتة فتحها واكلها للى جنبه
**************************
ولد بيقول لابيه عايزة2جنية علشان رايحة عند محمدين فقال الاب تاخد جنية وتروح عند محمد
**************************
واحد فشار اوي جاله واحد صحبه قعد يقوله امبارح جالي ابو لهب و حنظله و كنا بنتغدا مع بعض قاله يا عم انت هتشتغلني قاله و هشتغلك ليه امبارح كنا على طرابيزه واحده صحبه كان هيتجنن المهم نزل من عنده لقى ابن الراجل قاله صحيح الكلام ده قاله كلام ايه يا عمو قاله ابوك امبارح جاله ابو لهب و حنظله وكانو بيتغدو مع بعض؟ قاله بصراحه يا عمو مش عارف بس انا امبارح لقيت موكب من كام ناقه كده وكان مكتوب عليهم ملاكي قريش
**************************
مرة بنت قالت لامها : هو السمك بياكل سردين؟ قالت ا يوة قالت لها : ازاي بيفتح العلبة؟؟
**************************
مدرس انجليزى بيسأل تميذ بيقوله لو عايز تقول لواحد تعالى هنا تقوله ايه؟ قاله : اقوله come here قاله : ولو عايز تقوله ارجع هناك تانى ؟ قاله : الف من الناحية التانية واقوله come here.
**************************
واحد بيقول لامه الراجل ده بيبوس اختى ليه قالت اصله هيتجوزها قالها امال بابا هيتجوز الخدامه امتى
**************************
مرة ولد صغير راح لجارته وطلب منها انها توريه لسانها فسألتة ليه: فقالها عشان ماما بتقول ان لسانك زي العقربة
**************************
مره المدرس سأل الاطفال فى الفصل الى يفتكر نفسه غبى يقف ... بعد شويه وقف تلميذ ...فساله المدرس و ليه بقه يا سيدي بتفتكر نفسك غبي ..فرد عليه التلميذ اصلي محبيتش اشوفك واقف لواحداك يا أستاذ
**************************
مرة واحد غبي ماشى فى الشارع قال يارب يااااارب احط ايدى في جيبى الاقى 10جنيه يااااارب، حط ايده في جيبه لاقاه مخروم رجع يدور عليها لتكون وقعت
**************************
مرة واحد راح يخطب واحده، باباها قال له بس البنت لسة بتدرس، قال له خلاص اجلها في الفسحه
**************************
مرة واحد غبي ابنه قاله انا عاوز موبايل ابوه قاله موافق بس بشرط تركب اخواتك معاك
**************************
واحد غبي عنده ارق ومش عارف ينام....قال له صاحبه عندي لك طريقة للنوم مؤكدة...عد من واحد الى خمسميه... أخونا مكدبش خبر... وأول ما الدنيا ليلت راح للسرير وبدا يعد .. واحد .. اثنين .. ولما وصـل الى ميه وتسعة وتسعين ...كبس عليه النوم … قـام جري غـسـل وشه ورجــع للـسـريـر يـكـمـل الـعـد
**************************
مرة واحد محشش لقي كنز قال: كويس فاضل الخريطة!!
**************************
مرة اتنين أغبية طالعين رحلة فالسواق نزل استراحة ورجع لقى الفتيس مش موجود قالهم الفتيس راح فين...قالوله لقينك يا عم طول الطريق عمال تشد فيه مش عارف تخلعه قولنا نشلهولك
**************************
إتنين أغبية إشتروا حصانين وعاوزين يفرقوهم عن بعض راح الأولاني قطع ديل حصانه وقال لزميله أنت حصانك ديله مش مقطوع قاله لا مش باينه، راح شوية ورجع راح قاطع رجل حصان زميله وقال له حصانك رجله مقطوعة قال له لا مش باينه، راح قاطع راس حصانه ورجع قاله حصانك راسه مش مقطوعة قاله بيتهيألي أوضح حاجه إن حصانك بني وحصاني أبيض
**************************
مره اتنين مجانين اتفقوا انهم يهربوا من المستشفى واحد قال للتانى لو لاقينا الصور عالى هنهده لو لاقيناه واطى هنط من فوقيه التانى قاله ماشى راحوا مالاقوش صور خالص قالوا يخساره المهمه فشلت
**************************
مرة واحد غبى ماشى فى الشارع لقى قرد مشي بيه قابل عسكرى مرور سألوا اودى القرد ده فين العسكرى قال له ودىه جنينة الحيوان تانى يوم معدى بالقرد العسكرى قال له مش قلتلك وديه جنينة الحيوان قال له ما أنا وديته امبارح ، النهاردة بقى هاوديه السينما
**************************
مره قرية كلها أغبيا كان فيها حفره كل يوم واحد يقع فيها عملوا مجلس علشان يشوفوا حل للحفره دي قام واحد وقال يا جماعه احنا نحط عربية اسعاف جنب الحفره علشان المصابين يتنقلوا بسرعه قام التاني قال احنا نبني مستشفى جنب الحفره علشان يتنقلوا أسرع قام التالت قالهم يا جامعه انتوا مغلبين نفسكم ليه احنا نردم الحفرة دي ..ونحفر واحدة تانية جنب المستشفى
**************************
واحد راح يشتري عربية .لقى كل العربيات غالية عليه.بعدين لقى عربية قديمة و عليها تراب كتير بس سعرها مناسب.صاحب المحل قال له العربية دي فيها ميزة هايلة.بص كدة ..وقام مسح بإيده التراب اللي عليها قام طلع منها عفريت .قال له :شبيك لبيك تطلب إيه؟ قال له هات شاي للبيه حالاً..في لحظة كانت كباية الشاي قدام الراجل .قام اشترى العربية فوراً و ساقها و طلع بيها على حتة أرض فاضية و قام نزل و مسح التراب اللي علي العربية. قام طلع له العفريت. قاله عايزك تبني لي هنا قصر كبير فيه جنينة و حمام سباحة و ملعب تنس و..... قام العفريت قال حيلك حيلك إنت فهمت غلط .. أنا شاي و قهوة بس .
**************************
مرة واحد مسطول قاعد يفكر مع نفسه ويقول "جمبرى فى الطبق؟ لا لا ارنب فى الجردل؟ برضه لا مش دى استكوزا فى البانيو؟ يوووة برضه مش دى، انا هتصل اعرف من الدكتور احسن." راح اتصل بيه وساله "يا دكتور انا عندى ايه؟" قال له "انا قولت لك ميت مرة انت عندك سرطان فى الحوض"
**************************
واحد غبي جاله عقد عمل فى الكويت، يوم السفر قاعد فى المطار فالمذيع الداخلى بيقول : "على ركاب الرحله 770 المتوجهه الى الكويت التواجد بصاله الدخول"، "النداء الاخير لركاب الرحله 770 المتوجهه الى الكويت التواجد بصاله الدخول." فموظف المطار بيقوله "رحله الكويت هتطلع يا أستاذ" ، فيرد عليه ويقوله : "يا عم دول طالعين رحله .. انا طالع شغل."
**************************
مرة واحد قابل واحد اخنف فسالة قالة "انت بتشتغل اية؟" فرد علية الاخنف وقالة "فننان" قالة "يعنى بتغنى" فرد الاخنف "فننان" فرد الاخنف "فننان" قالة الراجل "يعنى اية بتمثل؟" يعنى فرد الاخنف قالة "لا فننان يعنى بحت العيش فى الفن"
**************************
احد غبى قوى حكموا عليه بالاعدام.. بعد ما علقوه فى المشنقه قعد يشاور ويخبط بأيده ورجليه ففكروه عاوز يقول حاجه مهمه.. ففكوه ونزلوه بسرعه.... فبص لهم وقال: ياجزم كنت هتخنق
**************************
بعد بحث دام عدة سنوات وقف العالم أمام حشد كبير من الناس ومن بينهم علماء العالم :وأخيراً وبعد عدة سنوات إليكم ما توصلت إليه وضع العالم على منضدة أمامه عنكبوتاً ثم قال للعنكبوت : امش للأمام خطوتين ،ففعل العنكبوت ثم قال :ارجع للخلف خطوتين ، ففعل العنكبوت ذلك ثم أخذ العنكبوت وخلع يديه ورجليه كلها ، ثم وضعها على المنضدة مرة أخرى وقل : امش للأمام خطوتين ،فلم يفعل العنكبوت ثم قال مرة أخرى : امش للخلف خطوتين ،فلم يفعل ذلك أيضاً وهنا نظر العالم للجمهور بكل ثقة وافتخار وقال :أرأيتم ذلك ،هذا ما توصلت إليه ،بأن العنكبوت إذا فقد أرجله يفقد حاسة السمع.
**************************
واحد ندل قعد يتحايل على حبيبته علشان تخرج معاه لمده سنه ولما وافقت راح قال لابوها
**************************
مره واحد عنده مزرعه فراخ وكانت فشله جدا راح لمهندس زراعى قاله انا مش عارف ازرع الفراخ قاله ليه قاله زرعتها من رجليها مطرحتش زرعتها من جناحها مطرحتش زرعتها من دماغها مطرحتش المهندس قاله هات عينه من الارض
**************************
واحد نايم جنب مراته فسمعت صوت، بتقوله يا قوم يا راجل فى حرامى فى الصاله، قالها يا شيخه نامى جنبك سبع، قالتله يا راجل فى حرامى فى اوضه النوم قالها يا شيخه نامى جنبك سبع، وبعدين قالتله يا راجل حرامى شالنى وماشى قالها روحى ماتخفيش سايبة فى البيت سبع
*
Posted by Unknown at 4:16 م 15 اللى زارونى
2009-04-18
حلويات.....وااااااااااااااااو
Posted by Unknown at 6:51 ص 10 اللى زارونى
2009-04-15
عملولى تاج .... انا ماليش دعوة انا بسمع الكلام
Posted by Unknown at 12:30 م 2 اللى زارونى
2009-03-21
امى....دائما فى قلبى
Posted by Unknown at 1:47 م 6 اللى زارونى